اندور میں آلودہ پانی سانحہ، اموات اور وزارتی بیان تنازع

اندور کے بھاگیرتھ پورہ میں آلودہ پانی سے اموات، سیکڑوں بیمار، حکومتی اعلان، وزارتی بدزبانی پر تنقید، بعد میں معذرت۔

ملک کے صاف ستھرے شہروں میں شمار ہونے والے مدھیہ پردیش کے شہر اندور سے ایک افسوسناک واقعہ سامنے آیا ہے، جہاں بھاگیرتھ پورہ علاقے میں آلودہ پانی پینے کے باعث کئی افراد کی جان چلی گئی جب کہ سینکڑوں لوگ شدید بیمار ہو گئے۔ اس واقعے نے نہ صرف مقامی انتظامیہ بلکہ ریاستی حکومت کے دعوؤں پر بھی سوال کھڑے کر دیے ہیں۔مدھیہ پردیش کے وزیر اعلیٰ موہن یادو نے بدھ کے روز اس معاملے پر سرکاری طور پر چار اموات کی تصدیق کی۔ تاہم مختلف میڈیا رپورٹس میں ہلاکتوں کی تعداد دس تک بتائی جا رہی ہے، جس سے صورتحال کی سنگینی کا اندازہ لگایا جا سکتا ہے۔ وزیر اعلیٰ کے مطابق اب تک 212 متاثرہ افراد کو اسپتال میں داخل کرایا گیا ہے، جن میں سے 50 مریضوں کو علاج کے بعد گھر بھیج دیا گیا ہے جب کہ 162 افراد ابھی زیر علاج ہیں۔ حکام کا کہنا ہے کہ تمام زیر علاج مریضوں کی حالت فی الحال مستحکم ہے۔
ریاستی حکومت کی جانب سے اعلان کیا گیا تھا کہ آلودہ پانی کے سبب بیمار ہونے والے تمام افراد کا علاج سرکاری خرچ پر کیا جائے گا۔ اس کے علاوہ جن لوگوں نے نجی اسپتالوں میں علاج کے لیے رقم خرچ کی ہے، انہیں وہ رقم واپس کی جائے گی۔ تاہم متاثرہ خاندانوں کا کہنا ہے کہ انہیں نہ تو مکمل طبی سہولیات مل رہی ہیں اور نہ ہی علاج پر خرچ کی گئی رقم کی واپسی کا عمل واضح ہے۔اسی پس منظر میں بدھ کے روز ایک صحافی نے مقامی رکن اسمبلی اور ریاستی کابینہ کے وزیر کیلاش وجے ورگیہ سے عوامی مسائل پر سوال کیا۔ صحافی نے علاج کے اخراجات کی واپسی اور پینے کے صاف پانی کی عدم دستی کے حوالے سے استفسار کیا۔ اس سوال کے جواب میں وزیر کی جانب سے غیر سنجیدہ اور نامناسب الفاظ استعمال کیے گئے، جس پر سوشل میڈیا اور عوامی حلقوں میں شدید تنقید کی گئی۔
بعد ازاں بڑھتی ہوئی تنقید کو دیکھتے ہوئے وزیر کیلاش وجے ورگیہ نے اپنے بیان پر افسوس کا اظہار کیا اور وضاحت پیش کی کہ ان کے الفاظ کا مقصد کسی کی دل آزاری نہیں تھا۔ انہوں نے کہا کہ حکومت متاثرین کی ہر ممکن مدد کرے گی اور معاملے کی مکمل جانچ کی جا رہی ہے۔یہ واقعہ ایک بار پھر شہری بنیادی سہولیات، خاص طور پر صاف پانی کی فراہمی اور حکومتی جوابدہی پر سنگین سوالات کھڑے کرتا ہے، جن کا بروقت اور شفاف حل نہایت ضروری ہے۔