شمالی بھارت میں شدید سردی اور گھنے کوہرے سے معمولاتِ زندگی متاثر

شمالی بھارت میں شدید سردی اور گھنا کوہرا، متعدد ریاستوں میں الرٹ، ٹرینیں اور پروازیں متاثر، عوام کو مشکلات درپیش۔

نئی دہلی۔شمالی بھارت میں ان دنوں موسم کا مزاج تیزی سے بدلتا ہوا نظر آ رہا ہے۔ شدید سردی اور گھنے کوہرے نے عام زندگی کو بری طرح متاثر کیا ہے۔ صبح اور رات کے اوقات میں حدِ نگاہ نہایت کم ہو جانے کے باعث سڑکوں، ریلوے اور ہوائی سفر میں مشکلات پیش آ رہی ہیں۔ اسی صورتحال کے پیشِ نظر محکمۂ موسمیاتِ ہند نے کئی ریاستوں کے لیے ریڈ، اورنج اور یلو الرٹ جاری کیے ہیں۔محکمۂ موسمیات کے مطابق مشرقی اور مغربی اتر پردیش کے کئی علاقوں میں انتہائی گھنا کوہرا چھایا رہا، جس کی وجہ سے ریڈ الرٹ نافذ کیا گیا ہے۔ آنے والے دنوں میں بھی ان علاقوں میں سردی اور کوہرے کی شدت برقرار رہنے کا امکان ظاہر کیا گیا ہے۔ ہماچل پردیش میں 30 دسمبر تک، جبکہ پنجاب، ہریانہ، چندی گڑھ اور اتر پردیش میں 31 دسمبر تک رات اور صبح کے وقت گھنے سے بہت گھنے کوہرے کے امکانات ہیں۔ اس کے علاوہ مشرقی مدھیہ پردیش، اروناچل پردیش، جموں ڈویژن، سب ہمالیائی مغربی بنگال، آسام، میگھالیہ، ناگالینڈ، منی پور، میزورم، تریپورہ اور اڑیسہ میں بھی کوہرے کی صورتحال رہنے کی پیش گوئی کی گئی ہے۔
محکمۂ موسمیات نے بتایا کہ مشرقی اتر پردیش اور بہار کے بعض حصوں میں سرد دن (کولڈ ڈے کنڈیشن) رہنے کا امکان ہے، جبکہ پنجاب، ہریانہ، دہلی، شمالی راجستھان، مدھیہ پردیش، چھتیس گڑھ اور جھارکھنڈ میں سرد لہر چل سکتی ہے۔ دہلی سمیت کئی ریاستوں میں گھنے کوہرے کے خدشے کے پیش نظر اورنج الرٹ نافذ کیا گیا ہے، جبکہ کچھ دیگر ریاستوں کے لیے یلو الرٹ جاری کیا گیا ہے۔پنجاب اور ہریانہ میں شدید سردی کا سلسلہ جاری ہے۔ ہریانہ کے حصار میں کم سے کم درجۂ حرارت 2.5 ڈگری سیلسیس ریکارڈ کیا گیا، جو موسم کی شدت کو ظاہر کرتا ہے۔ چندی گڑھ میں بھی درجۂ حرارت معمول سے کم رہا اور صبح کے وقت گھنے کوہرے نے حدِ نگاہ کو متاثر کیا۔
گھنے کوہرے کا سب سے زیادہ اثر آمد و رفت پر پڑا ہے۔ شمالی بھارت کے کئی حصوں میں ٹرین اور ہوائی خدمات متاثر ہوئیں۔ درجنوں ٹرینیں تاخیر کا شکار ہوئیں اور بعض کو متبادل راستوں پر موڑ دیا گیا۔ احتیاطی تدابیر کے طور پر ٹرینوں کی رفتار کم کر دی گئی، جس سے مسافروں کو پریشانی کا سامنا کرنا پڑا۔ ہوائی سفر پر بھی منفی اثر پڑا اور کئی پروازیں تاخیر سے چلیں۔ مختلف ایئرلائنز نے مسافروں کے لیے سفری ہدایات جاری کرتے ہوئے انہیں سفر سے قبل اپنی فلائٹ اور ٹرین کا اسٹیٹس چیک کرنے کا مشورہ دیا ہے۔