امریکہ میں ایپستین فائلوں کے اجرا سے متعلق قانون پر ٹرمپ کے دستخط

ڈونالڈ ٹرمپ نے ایپستین فائلوں کے اجرا کا قانون منظور کیا، محکمۂ انصاف کو ریکارڈ 30 دن میں عوام کے لیے جاری کرنا ہوگا۔

امریکہ کے صدر ڈونالڈ ٹرمپ نے اعلان کیا ہے کہ انہوں نے اس بل پر دستخط کر دیے ہیں جس کے تحت وفاقی محکمۂ انصاف کو ہدایت دی گئی ہے کہ وہ بدنام زمانہ مالیاتی شخصیات میں شامل اور جنسی جرائم کے مقدمات میں سزا یافتہ جیفری ایپستین سے متعلق تمام ریکارڈ عام کرے۔ قانون کے مطابق محکمۂ انصاف کو یہ معلومات 30 دن کے اندر ایسی شکل میں فراہم کرنا ہوں گی جو تلاش اور ڈاؤن لوڈ کی جا سکے۔جیفری ایپستین کی 2019 میں حراست کے دوران موت ہو گئی تھی، لیکن ان کے خلاف لگائے گئے الزامات، ان کے اثرورسوخ اور بااثر شخصیات سے تعلقات کے باعث یہ معاملہ اب بھی امریکی سیاست اور میڈیا میں زیربحث رہتا ہے۔
ابتدا میں ٹرمپ نے اس ریکارڈ کو جاری کرنے کی مخالفت کی تھی، لیکن ایپستین کیس کے متاثرین، انسانی حقوق کے کارکنوں اور ان کی اپنی ریپبلکن پارٹی کے بعض اراکین کی جانب سے شدید اعتراضات کے بعد انہوں نے اپنا فیصلہ بدل دیا۔ گزشتہ ہفتے ٹرمپ نے اپنی جماعت کے اراکین پر زور دیا تھا کہ وہ اس بل کی حمایت کریں۔ ان کا کہنا تھا کہ ریپبلکن ارکان کو اس لیے اس کے حق میں ووٹ دینا چاہیے کیونکہ “ہمارے پاس چھپانے کو کچھ نہیں۔”منگل کو یہ قانون ایوانِ نمائندگان اور سینیٹ دونوں سے منظور ہوا۔ ایوانِ نمائندگان میں اس کے حق میں 427 ووٹ آئے جب کہ صرف ایک رکن نے مخالفت کی۔ سینیٹ نے اسے اتفاقِ رائے سے منظور کر لیا، اور کسی باقاعدہ ووٹنگ کی ضرورت پیش نہیں آئی۔
بل کی منظوری کے اگلے روز ٹرمپ نے اپنی سوشل میڈیا پلیٹ فارم ’ٹروتھ سوشل‘ پر کہا کہ ڈیموکریٹ رہنما اس معاملے کو اس لیے اٹھا رہے ہیں تاکہ ان کی انتظامیہ کی کامیابیوں سے عوام کی توجہ ہٹائی جا سکے۔ ٹرمپ نے یہ الزام بھی لگایا کہ کئی معروف ڈیموکریٹس کے ایپستین سے تعلقات رہے ہیں، اور ان کے بقول ریکارڈ جاری ہونے کے بعد یہ سب حقیقت سامنے آ جائے گی۔حال ہی میں امریکی ایوان کی اوور سائٹ کمیٹی بیس ہزار صفحات پر مشتمل جدید دستاویزات جاری کر چکی ہے جن میں بعض جگہوں پر خود ٹرمپ کا نام بھی موجود ہے۔ ٹرمپ یہ دعویٰ کرتے رہے ہیں کہ اگرچہ ماضی میں وہ ایپستین سے واقف تھے، لیکن انہوں نے 2000 کی دہائی کے آغاز میں اس سے تمام روابط ختم کر دیے تھے۔