نیویارک کے نئے میئر زہران ممدانی کا جیت کے بعد نہرو کو خراجِ تحسین

نیویارک کے نئے میئر زہران ممدانی نے جیت پر نہرو کے الفاظ دہرا کر نئی سیاسی شروعات اور امید کا پیغام دیا۔

نیویارک کے میئر الیکشن میں تاریخی کامیابی حاصل کرنے والے زہران ممدانی نے اپنے خطاب میں بھارت کے پہلے وزیرِ اعظم جواہر لال نہرو کے مشہور اور لازوال الفاظ کا حوالہ دیتے ہوئے کہا کہ آج نیویارک نے ایک نئے دور میں قدم رکھا ہے۔ ان کے یہ الفاظ سامعین کے دلوں میں گونج اٹھے اور ایک نئے سیاسی عہد کے آغاز کی علامت بن گئے۔اپنے جذباتی خطاب میں ممدانی نے کہا، ’’آپ سب کے سامنے کھڑا ہو کر مجھے نہرو کے وہ الفاظ یاد آ رہے ہیں۔ تاریخ میں کبھی کبھی ایسا لمحہ آتا ہے جب ہم پرانے سے نئے کی طرف قدم بڑھاتے ہیں، جب ایک عہد ختم ہوتا ہے اور جب کسی قوم کی دبائی ہوئی روح اپنی آزادی پاتی ہے۔ آج رات ہم نے پرانے سے نئے کی جانب وہ قدم بڑھا لیا ہے۔‘‘
ممدانی نے اپنی جیت کو صرف ذاتی کامیابی کے طور پر نہیں بلکہ نیویارک کے شہریوں کے لیے ایک نئی شروعات قرار دیا۔ ان کا کہنا تھا کہ اب وہ وقت گزر چکا ہے جب رہنما عوام کو یہ بتاتے تھے کہ وہ کیا نہیں کر سکتے۔ اب عوام اپنے لیڈروں سے یہ توقع کریں گے کہ وہ انہیں یہ دکھائیں کہ وہ کیا حاصل کر سکتے ہیں۔کانگریس پارٹی نے سوشل میڈیا پلیٹ فارم ایکس (X) پر اس خطاب کی طرف توجہ دلاتے ہوئے لکھا کہ زہران ممدانی نے نہرو کی تاریخی تقریر “ٹرسٹ وِد ڈیسٹنی” (Tryst with Destiny) سے اقتباس پیش کیا ہے۔ کانگریس نے یہ بھی یاد دلایا کہ یہی الفاظ نومبر 2013 میں اسکاٹ لینڈ کی آزادی کی مہم کے دوران اس وقت کے وزیرِ اعظم ایلیکس سیلمَنڈ (Alex Salmond) نے بھی اپنے خطاب میں استعمال کیے تھے۔
کانگریس نے اپنے پیغام میں لکھا، ’’یہ بات دلچسپ ہے کہ نہرو کے وہی تاریخی الفاظ جو انہوں نے بھارت کی آزادی کی رات ادا کیے تھے، آج بھی دنیا بھر میں تبدیلی، آزادی اور نئی شروعات کی علامت بنے ہوئے ہیں۔ چاہے وہ اسکاٹ لینڈ کی تحریکِ آزادی ہو یا اب نیویارک میں ایک نئی سیاسی بیداری، نہرو کے الفاظ آج بھی رہنماؤں اور عوام کے لیے ترغیب کا سرچشمہ ہیں۔‘‘نہرو کی تقریر، جو 14 اگست 1947 کی رات دہلی کے قانون ساز اسمبلی ہال میں دی گئی تھی، آزادی، خود مختاری اور انسانی وقار کے جذبے کی عکاس تھی۔ زہران ممدانی کا اسے اپنے خطاب میں شامل کرنا نہ صرف ماضی کے ایک تاریخی لمحے کو یاد کرنا تھا بلکہ مستقبل کے ایک بہتر اور انصاف پر مبنی معاشرے کے عزم کی تجدید بھی تھی۔یہ جیت، ممدانی کے بقول، صرف ایک سیاسی کامیابی نہیں بلکہ ایک اجتماعی خواب کی تعبیر ہے — ایک ایسا نیویارک جہاں قیادت خوف یا مفاد کے بجائے امید، عمل اور اتحاد کی بنیاد پر آگے بڑھے۔