بیگوسرائے اسٹیشن پرمال گاڑی گزری،خواتین اوربچہ معجزانہ طور پرمحفوظ

بیگوسرائے ریلوے اسٹیشن پر دو خواتین اور بچہ پٹری پر لیٹے، مال گاڑی اوپر سے گزری، معجزانہ طور پر تینوں محفوظ رہے۔

بہار۔بیگوسرائے ریلوے اسٹیشن پر ایک ایسا دل دہلا دینے والا واقعہ پیش آیا جسے دیکھنے والے ہر شخص کی سانسیں رک گئیں۔ دو خواتین اور ایک بچہ پٹری پر پیٹ کے بل لیٹے رہے اور ان کے اوپر سے پوری کی پوری مال گاڑی گزر گئی، لیکن حیرت انگیز طور پر تینوں کی جان بچ گئی۔ اس واقعے کی ویڈیو سوشل میڈیا پر تیزی سے وائرل ہورہی ہے۔یہ حادثہ منگل کی سہ پہر تقریباً تین بجے پیش آیا۔ اس وقت پلیٹ فارم نمبر دو پر ریاسترانی ایکسپریس کھڑی تھی جب کہ پلیٹ فارم نمبر ایک پر بڑی تعداد میں مسافر اپنی ٹرین کا انتظار کر رہے تھے۔ اسی دوران درمیان والی لائن پر ایک مال گاڑی کھڑی تھی۔ جلدی میں کچھ خواتین مسافر مال گاڑی کے نیچے سے گزر کر دوسرے پلیٹ فارم تک پہنچنے کی کوشش کر رہی تھیں کہ اچانک مال گاڑی حرکت میں آگئی۔گاڑی کے چلنے پر گھبراہٹ میں دو خواتین اور ایک بچہ سیدھا پٹری پر پیٹ کے بل لیٹ گئے۔ لمحہ بھر کے لیے ایسا لگا کہ ان کی زندگی ختم ہوگئی ہے، مگر خوش قسمتی سے مال گاڑی ان کے اوپر سے گزر گئی اور کسی کو چوٹ تک نہ آئی۔ جیسے ہی ٹرین آگے بڑھی، آس پاس کے مسافر فوراً بھاگ کر پہنچے اور خواتین و بچے کو اٹھایا۔ یہ منظر دیکھنے والے سینکڑوں مسافروں کے دل دہل گئے اور اسٹیشن پر خوف و ہراس کی فضا قائم ہوگئی۔
اس وقت ریلوے اسٹیشن پر امتحانات کے سلسلے میں غیر معمولی بھیڑ موجود تھی، جس کی وجہ سے افراتفری مزید بڑھ گئی۔ کئی مسافروں نے اس واقعے کو اپنے موبائل فون پر ریکارڈ کیا اور ویڈیو سوشل میڈیا پر پھیل گئی۔بعد میں ریلوے پولیس فورس (آر پی ایف) اور جی آر پی کے اہلکار بھی موقع پر پہنچے اور خواتین کو محفوظ پلیٹ فارم پر لے گئے۔ اس کے باوجود یہ سوال اٹھنے لگا کہ جب خواتین کو مال گاڑی کے نیچے سے گزرتے دیکھا گیا تو ریلوے پولیس نے انہیں روکا کیوں نہیں؟اس حوالے سے آر پی ایف انسپکٹر اروند کمار نے وضاحت کرتے ہوئے کہا کہ کچھ خواتین مال گاڑی کے نیچے سے گزرنے کی کوشش کر رہی تھیں کہ اچانک گاڑی چل پڑی۔ خوفزدہ ہوکر وہ پٹری پر لیٹ گئیں۔ خوش قسمتی یہ رہی کہ وہ زندہ سلامت بچ گئیں۔
ریلوے انتظامیہ کا کہنا ہے کہ مسافروں کو ہمیشہ ہدایت دی جاتی ہے کہ کسی بھی صورت میں پٹری عبور نہ کریں اور نہ ہی کھڑی ہوئی ٹرین کے نیچے سے گزرنے کی کوشش کریں۔ اس واقعے نے ایک بار پھر یہ خطرہ واضح کر دیا ہے کہ ذرا سی لاپرواہی بڑی جان لیوا ثابت ہوسکتی ہے۔