کپل شرما گینگ وار کی زد میں؟

کینیڈا میں کپل شرما کے کیفے پر دوبارہ فائرنگ، لارنس بشنوئی گروہ نے دھمکی دی، مقصد خوف پھیلانا یا بھتہ خوری ہوسکتا ہے۔

کینیڈا کے شہر سرے میں واقع مشہور کامیڈین کپل شرما کے کیفے “Kaps Cafe” پر ایک بار پھر فائرنگ کا واقعہ پیش آیا ہے۔ یہ ایک ماہ کے اندر اسی کیفے پر دوسرا حملہ ہے۔ تازہ واقعے میں کسی کے زخمی ہونے کی اطلاع نہیں ملی، جس سے اندازہ ہوتا ہے کہ حملے کا مقصد صرف خوف پھیلانا یا کپل شرما کو ڈرانا ہو سکتا ہے، نہ کہ کسی کو نشانہ بنانا۔ اس حملے کی ذمہ داری لارنس بشنوئی گروہ سے وابستہ کئی افراد نے سوشل میڈیا کے ذریعے قبول کی ہے، جن میں گولڈی ڈھلوں، انکت بدھو شیرےوالا، جتیندر گوگی مان گروپ، کالا رانا، آرجو بشنوئی، ہری باکسر، شبھم لونکر اور ساحل دوہن پیٹواڑ شامل ہیں۔یہ سوال اب شدت اختیار کر گیا ہے کہ کپل شرما جیسے مشہور کامیڈین کو اس گروہ نے کیوں نشانے پر لیا ہے۔ مبینہ طور پر اس کی ایک وجہ کپل کا سلمان خان سے قریبی تعلق بھی بتایا جا رہا ہے۔ سلمان خان کو پہلے ہی لارنس گینگ کی جانب سے دھمکیاں دی جا چکی ہیں اور اُن کے گھر کی ریکی بھی کی گئی ہے۔ کپل اور سلمان کی دوستی اس گروہ کو ناگوار گزر رہی ہے، جس کے باعث وہ کپل شرما کے خلاف بھی سرگرم نظر آ رہے ہیں۔
کچھ رپورٹس کے مطابق کپل شرما کی مقبولیت اور ان کی شوبز انڈسٹری میں بلندی، اس گروہ کو مالی فائدے کے لیے بھتہ خوری کی طرف لے جا سکتی ہے۔ آرجو بشنوئی، جو کہ گروہ کا رکن ہے، مبینہ طور پر اسی قسم کے معاملات میں ملوث ہے۔ ایسا بھی مانا جا رہا ہے کہ لارنس گروہ، ڈی کمپنی کی طرز پر بالی ووڈ میں اثر و رسوخ قائم کرنے کی کوشش کر رہا ہے۔ پہلے یہ گروہ پنجابی گلوکاروں اور اداکاروں کو نشانہ بناتا تھا، اب کپل شرما کے ذریعے فلم انڈسٹری میں داخل ہونے کی کوشش کی جا رہی ہے۔یہ بھی یاد رہے کہ 10 جولائی کو جب پہلی بار کپل شرما کے کیفے پر فائرنگ ہوئی تھی، تب اس کی ذمہ داری بابرب خالصہ انٹرنیشنل کے مبینہ دہشتگرد ہرجیت سنگھ نے لی تھی، جس نے دعویٰ کیا تھا کہ کپل نے اپنے شو میں نہنگوں کے لباس کا مذاق اڑایا تھا۔ اس پہلو کو بھی نظرانداز نہیں کیا جا سکتا، کیونکہ مذہبی جذبات کی توہین بعض حلقوں کو مشتعل کر سکتی ہے۔
حالیہ دھمکیوں میں جس سوشل میڈیا پوسٹ کا ذکر ہوا، اُس میں شبھم لونکر کا نام بھی نمایاں ہے۔ شبھم کو لارنس کا قریبی ساتھی مانا جاتا ہے اور وہ بابا صدیقی کے قتل جیسے سنگین معاملے میں بھی ملوث رہا ہے۔ ماضی میں اس کا نام سلمان خان کو دھمکانے کے لیے بھی استعمال کیا جا چکا ہے، اس لیے ممکن ہے کہ اسی حربے سے کپل شرما کو بھی خوفزدہ کیا جا رہا ہو۔اطلاعات کے مطابق کپل شرما کو ممبئی پولیس کی جانب سے سیکورٹی فراہم کی جا چکی ہے، اور اگر خطرہ بڑھتا ہے تو ان کی حفاظت کے انتظامات مزید سخت کیے جا سکتے ہیں۔