ممبئی میں ٹیسلا کا پہلا قدم، ماڈل Y کی فروخت شروع

ٹیسلا 15 جولائی سے ممبئی میں اپنا پہلا شوروم کھول رہی ہے، جہاں چین سے درآمد شدہ ماڈل Y کی فروخت ہوگی، قیمت تقریباً 48 لاکھ ہوگی۔

ایلون مسک کی مشہور الیکٹرک کار کمپنی ’ٹیسلا‘ جلد ہی بھارتی بازار میں اپنی موجودگی درج کرانے جا رہی ہے۔ کمپنی کا پہلا شوروم ممبئی کے باندرہ کرلا کمپلیکس (BKC) میں 15 جولائی سے عوام کے لیے کھلنے والا ہے۔ اس شوروم کا رقبہ تقریباً 4000 اسکوائر فٹ ہے، جو نہ صرف گاڑیوں کی فروخت کے لیے استعمال ہوگا بلکہ یہاں صارفین کو ٹیسلا کی جدید ٹیکنالوجی سے روبرو ہونے کا موقع بھی ملے گا۔ابتدائی طور پر ٹیسلا اپنا ماڈل ’Y‘ متعارف کرا رہی ہے، جسے چین کی شنگھائی فیکٹری سے درآمد کیا گیا ہے۔ اس گاڑی کی بنیادی قیمت تقریباً 27.7 لاکھ روپے ہے، مگر درآمدی ڈیوٹی اور دیگر چارجز ملا کر قیمت 48 لاکھ روپے تک پہنچ سکتی ہے۔ بھارتی قوانین کے مطابق، 40,000 ڈالر سے کم قیمت والی درآمدی گاڑیوں پر تقریباً 70 فیصد ٹیرف لاگو ہوتا ہے۔
شوروم کی جگہ کمپنی نے پانچ سال کے لیے کرائے پر لی ہے، جس کا ماہانہ کرایہ 35 لاکھ روپے بتایا جا رہا ہے، جو ملک کے مہنگے ترین کمرشل کرایوں میں شامل ہے۔ اگرچہ ٹیسلا نے فی الحال مقامی سطح پر مینوفیکچرنگ شروع کرنے کا کوئی اعلان نہیں کیا، لیکن اس نے فروخت، سروس اور ڈیلیوری کے لیے عملے کی بھرتی شروع کر دی ہے۔کمپنی کے بھارتی سربراہ پرشانت مینن کے حالیہ استعفیٰ کے بعد فی الحال چین میں موجود ٹیم بھارت کے آپریشنز کی نگرانی کر رہی ہے۔ اس دوران، امریکہ، چین اور نیدرلینڈز سے گاڑیوں کے پرزے، سپر چارجرز اور دیگر لوازمات بھی بھارت پہنچائے جا چکے ہیں۔
ٹیسلا کی یہ پیش قدمی ایسے وقت میں ہو رہی ہے جب بھارت میں ای وی مارکیٹ تیزی سے وسعت پا رہی ہے۔ اگرچہ 2023 میں صرف 2 فیصد کاریں ہی الیکٹرک تھیں، حکومت کا ہدف ہے کہ 2030 تک یہ شرح 30 فیصد ہو جائے۔ اس فضا میں ٹیسلا کو ٹاٹا اور مہندرا جیسی تجربہ کار مقامی کمپنیوں سے سخت مسابقت کا سامنا ہوگا، مگر اپنی جدید ٹیکنالوجی اور عالمی شہرت یافتہ معیار کی بدولت یہ کمپنی ایک مضبوط چیلنج بن کر ابھر سکتی ہے۔