ایران جلد یورینیم افزودگی دوبارہ شروع کر سکتا ہے: آئی اے ای اے

آئی اے ای اے کے سربراہ رافائل گروسی نے کہا ہے کہ ایران چند ماہ میں دوبارہ یورینیم افزودہ کرنے کی صلاحیت رکھتا ہے، حالیہ امریکی و اسرائیلی حملوں سے تنصیبات متاثر ہوئیں مگر مکمل تباہ نہیں ہوئیں۔

بین الاقوامی ایٹمی توانائی ایجنسی (IAEA) کے ڈائریکٹر جنرل رافائل گروسی نے کہا ہے کہ ایران کے پاس آئندہ چند مہینوں میں دوبارہ یورینیم افزودگی کا عمل شروع کرنے کی مکمل صلاحیت موجود ہے۔امریکی نشریاتی ادارے سی بی ایس نیوز کو دیے گئے ایک انٹرویو میں انہوں نے وضاحت کی کہ اگرچہ حالیہ امریکی حملوں سے ایران کے بعض جوہری تنصیبات کو نقصان پہنچا ہے، تاہم وہ مکمل طور پر تباہ نہیں ہوئیں۔
رافائل گروسی کا یہ بیان اُس وقت سامنے آیا ہے جب سابق امریکی صدر ڈونالڈ ٹرمپ نے دعویٰ کیا تھا کہ امریکہ نے ایران کے جوہری مراکز کو مکمل طور پر تباہ کر دیا ہے۔یاد رہے کہ 13 جون کو اسرائیل نے دعویٰ کیا تھا کہ ایران جوہری ہتھیار بنانے کے قریب پہنچ چکا ہے، جس کے بعد اس نے ایرانی تنصیبات پر حملہ کیا۔ بعد ازاں، امریکہ نے بھی فردو، نطنز اور اصفہان میں واقع جوہری مراکز کو نشانہ بنایا۔ان حملوں کے ردعمل میں ایران نے بھی جوابی کارروائی کی، جس سے خطے میں کشیدگی میں مزید اضافہ ہو گیا ہے۔