جھوٹے الزامات پر سزا کا امکان، لوک پال نے دی تنبیہ
لوک پال نے سیبی کی سابق چیئرپرسن مادھبی پوری بُچ کو ہنڈنبرگ رپورٹ کی بنیاد پر لگے بدعنوانی کے الزامات سے بری کرتے ہوئے کلین چٹ دے دی، اور جھوٹے الزامات لگانے والوں کو تنبیہ کی۔
نئی دہلی:بھارت میں بدعنوانی سے متعلق شکایات کی جانچ کرنے والے اعلیٰ ادارے لوک پال نے سیکیورٹی مارکیٹ کے نگراں ادارے سیبی (SEBI) کی سابق چیئرپرسن مادھبی پوری بُچ کو الزامات سے بری کرتے ہوئے انہیں کلین چٹ دے دی ہے۔ ان پر مبینہ طور پر ہنڈنبرگ ریسرچ کی ایک رپورٹ کی بنیاد پر مفادات کے تصادم اور غیر مناسب طرز عمل کا الزام عائد کیا گیا تھا۔بدھ کے روز جاری کردہ اپنے فیصلے میں لوک پال نے واضح کیا کہ مادھبی پوری بُچ کے خلاف لگائے گئے الزامات صرف مفروضوں پر مبنی تھے، جن کے حق میں کوئی مضبوط شواہد پیش نہیں کیے جا سکے۔ چھ رکنی بینچ کی سربراہی جسٹس اے ایم خانولکر نے کی، اور فیصلے میں کہا گیا کہ ان الزامات میں بدعنوانی یا مجرمانہ پہلو کا کوئی ثبوت موجود نہیں۔
یہ الزامات معروف وکیل پراشانت بھوشن، ترنمول کانگریس کی رکن پارلیمان مہوا موئترا، اور سابق آئی پی ایس افسر امیتابھ ٹھاکر کی جانب سے لگائے گئے تھے۔ تاہم، لوک پال نے اپنے 116 صفحات پر مشتمل فیصلے میں نہ صرف ان الزامات کو خارج کیا بلکہ شکایت کنندگان کو اس معاملے کو غیر ضروری طور پر سیاسی اور سنسنی خیز بنانے پر تنبیہ بھی کی۔فیصلے میں کہا گیا ہے کہ ایسا طرزِ عمل لوک پال اور لوک ایکتہ ایکٹ 2013 کی دفعہ 46 کے تحت قابل سزا ہو سکتا ہے، جو جھوٹی یا بدنیتی پر مبنی شکایات پر ایک سال تک کی قید یا ایک لاکھ روپے تک جرمانے کی اجازت دیتا ہے۔شکایت میں بُچ پر الزام تھا کہ انہوں نے اڈانی گروپ سے جڑے سرمایہ کاریوں، مشاورتی فیس اور کرایے کی آمدنی کے ذریعے ناجائز فائدہ اٹھایا، اور ICICI بینک کے ESOP (ملازمین کیلئے حصص منصوبہ) سے بھی غیر قانونی منافع حاصل کیا۔ لیکن لوک پال نے ان تمام الزامات کو ثبوت کی عدم موجودگی کی بنیاد پر مسترد کر دیا۔
تفصیلی فیصلے میں یہ بات بھی سامنے آئی کہ یہ شکایات زیادہ تر ایک غیر ملکی سرمایہ کاری کمپنی کی رپورٹ پر مبنی تھیں، جو بنیادی طور پر اڈانی گروپ کو نشانہ بنانے کیلئے تیار کی گئی تھی۔بُچ نے 2 مارچ 2022 کو سیبی کی چیئرپرسن کے طور پر ذمہ داریاں سنبھالی تھیں اور 28 فروری 2024 کو اپنے عہدے سے سبکدوش ہوئیں۔ دلچسپ بات یہ ہے کہ ان کے خلاف الزامات لگانے والی امریکی تحقیقاتی کمپنی ہنڈنبرگ ریسرچ نے جنوری 2024 میں اپنی بندش کا اعلان کر دیا تھا۔
لوک پال کو بُچ کے خلاف تین شکایات موصول ہوئیں، لیکن یہ سبھی شکایات یا تو غیر واضح تھیں یا بدعنوانی کے قوانین کے تحت ناقابل قبول تھیں۔فیصلے میں یہ بھی انکشاف ہوا کہ ایک شکایت کنندہ نے غیر قانونی طریقے سے بُچ اور ان کے شوہر کے ذاتی دستاویزات حاصل کیے، جنہیں بعد میں میڈیا میں پریس کانفرنس کے ذریعے جاری کیا گیا۔ ان میں ان کے شوہر کی کمپنی اگورا ایڈوائزری اور ان کے انکم ٹیکس گوشوارے شامل تھے۔ایک اور شکایت کنندہ نے سیبی کے خفیہ دستاویزات تک رسائی حاصل کرنے کی کوشش کی، جب کہ ایک نے اپنی شکایت کو سوشل میڈیا پر عام کر دیا، جسے لوک پال نے رازداری کی خلاف ورزی قرار دیا۔ ادارے نے کہا کہ یہ طرز عمل اس بات کی نشاندہی کرتا ہے کہ شکایات کا مقصد انصاف حاصل کرنا نہیں بلکہ محض شہرت اور سیاسی فائدہ تھا۔
