دہلی-این سی آر میں تیز آندھی، بارش اور ژالہ باری سے معمولات زندگی متاثر

دہلی اور این سی آر میں بدھ کی شام تیز آندھی، بارش اور ژالہ باری سے معمولات زندگی متاثر ہوئے، کئی درخت و کھمبے گرے اور ایک عارضی پل بھی منہدم ہو گیا۔

بدھ کی شام دہلی اور این سی آر (نوئیڈا، غازی آباد وغیرہ) کے علاقوں میں موسم نے اچانک کروٹ بدلی۔ رات آٹھ بجے کے قریب تیز آندھی نے کئی علاقوں کو اپنی لپیٹ میں لے لیا۔ آندھی اتنی شدید تھی کہ سڑکوں پر گاڑیاں روک دی گئیں، درخت جڑ سے اکھڑ گئے اور کئی مقامات پر بجلی کے کھمبے بھی زمین بوس ہو گئے۔ آندھی کے بعد بارش اور ژالہ باری نے موسم کو مزید بدل دیا۔اس اچانک موسمی تبدیلی کے باعث کئی علاقوں میں بجلی منقطع ہو گئی اور پانی جمع ہونے سے آمدورفت متاثر ہوئی۔ دہلی کے ساتھ ساتھ نوئیڈا میں بھی تیز ہواؤں اور بارش کی شدت دیکھی گئی، جس سے درخت گرنے اور انفراسٹرکچر کو نقصان پہنچنے کی اطلاعات موصول ہوئی ہیں۔
رپورٹس کے مطابق:
دہلی کے صفدرجنگ علاقے میں ہوا کی رفتار 79 کلومیٹر فی گھنٹہ تک ریکارڈ کی گئی۔
پالَم میں 74 کلومیٹر فی گھنٹہ اورپرگتی میدان میں 78 کلومیٹر فی گھنٹہ کی رفتار سے ہوائیں چلیں۔
اس شدید موسم کے باعث پروازوں پر بھی اثر پڑا ہے، خاص طور پر دہلی، چندی گڑھ اور کولکاتا کے ہوائی سفر میں رکاوٹ پیش آئی۔ دہلی ایئرپورٹ انتظامیہ کی جانب سے مسافروں کو احتیاطی تدابیر اختیار کرنے کی ہدایت دی گئی ہے۔نہرو وہار، شمالی دہلی میں ایک نالے پر قائم عارضی پل تیز آندھی کی وجہ سے گر گیا، جس سے تین موٹر سائیکل سوار نالے میں جا گرے۔ ان میں سے دو افراد کو نکال لیا گیا ہے، جب کہ ایک شخص تاحال لاپتہ ہے۔
اگرچہ اس تیز بارش اور ژالہ باری نے گرمی سے کچھ راحت دی ہے، لیکن آندھی و طوفان نے جانی و مالی نقصان کا خدشہ بھی پیدا کر دیا ہے۔ محکمہ موسمیات کی جانب سے شہریوں کو محتاط رہنے کی ہدایت کی گئی ہے۔