آپریشن سندور کے بعد فائر بندی پر بات چیت

بھارت اور پاکستان کے ڈی جی ایم اوز نے فائر بندی پر اتفاق کیا، جس میں دونوں ممالک نے ایک دوسرے پر فائرنگ نہ کرنے کی یقین دہانی کرائی۔

نئی دہلی: بھارت اور پاکستان کے ڈائریکٹر جنرل ملٹری آپریشنز (ڈی جی ایم او) کے درمیان پیر کے روز ایک اہم بات چیت ہوئی، جس میں 10 مئی کو طے پانے والے فائر بندی معاہدے کے مختلف نکات پر غور کیا گیا۔ اس رابطے میں دونوں جانب سے اس بات پر اتفاق کیا گیا کہ لائن آف کنٹرول پر فائرنگ یا کسی قسم کی جارحانہ کارروائی نہیں کی جائے گی۔ یہ بات چیت پہلے دن میں طے تھی، مگر شام پانچ بجے عمل میں آئی۔
مصدقہ ذرائع کے مطابق بھارت کی طرف سے لیفٹیننٹ جنرل راجیِو گھئی اور پاکستان کی جانب سے میجر جنرل کاشف عبداللہ نے نمائندگی کی۔ اس بات چیت میں خاص طور پر لائن آف کنٹرول پر امن قائم رکھنے، کسی بھی قسم کی اشتعال انگیزی سے گریز کرنے اور باہمی اعتماد کو فروغ دینے جیسے نکات زیرِ بحث آئے۔یہ پیش رفت اُس وقت سامنے آئی ہے جب بھارت کی جانب سے “آپریشن سندور” کے تحت پاکستان اور پاکستان کے زیرِ انتظام کشمیر (پی او کے) میں دہشت گردی کے مراکز پر کارروائی کی گئی تھی۔ 22 اپریل کو پہلگام میں ہوئے دہشتگردانہ حملے، جس میں 26 بےگناہ سیاح مارے گئے تھے، کے بعد بھارت نے بھرپور فوجی ردعمل دیا تھا۔ بھارتی فوج کے مطابق اس کارروائی میں صرف دہشتگردوں کے ٹھکانوں کو نشانہ بنایا گیا اور سو سے زائد شدت پسند ہلاک کیے گئے۔
فوجی ذرائع کے مطابق، کارروائی کے جواب میں پاکستانی فوج نے بھی حملے کیے، تاہم بھارتی فضائی دفاعی نظام نے ان تمام کوششوں کو ناکام بنا دیا۔ ڈی جی ایم او نے بتایا کہ 9 اور 10 مئی کی درمیانی رات پاکستان کی طرف سے کی گئی فضائی کارروائیاں بھارتی فضائیہ اور دفاعی نظام کی بروقت تیاری کے باعث کسی بھی ہدف کو نقصان پہنچانے میں ناکام رہیں۔ بھارتی فوج کی تینوں شاخوں کے باہمی تال میل نے دفاع کو مزید مؤثر بنایا۔
ذرائع کے مطابق، پاکستان نے بھارت کے سامنے 10 مئی کو فائر بندی کی پیشکش رکھی تھی، جسے بھارت نے اپنی شرائط کے ساتھ قبول کیا۔ فریقین نے طے کیا کہ دونوں ممالک 2021 کے فائر بندی معاہدے کی روح کے مطابق امن قائم رکھنے کی کوشش کریں گے اور کسی بھی پیش رفت کے لیے ہاٹ لائن رابطے کو جاری رکھیں گے۔یہ مذاکرات ایک ایسے وقت پر ہوئے ہیں جب دونوں ممالک کے درمیان کشیدگی شدید تھی، لیکن تازہ پیش رفت سے لگتا ہے کہ سفارتی اور عسکری سطح پر تناؤ میں کمی کی ایک کوشش کی جا رہی ہے۔ تاہم بھارتی قیادت نے واضح کر دیا ہے کہ دہشتگردی کے خلاف کاروائیوں میں کوئی نرمی نہیں برتی جائے گی۔