امریکی جامعات کا ٹرمپ انتظامیہ کے دباؤ کے خلاف خفیہ اتحاد
چند بڑی امریکی یونیورسٹیوں نے ٹرمپ انتظامیہ کی تعلیمی آزادی اور فنڈنگ پر دباؤ کے خلاف خفیہ اتحاد قائم کیا ہے، تاکہ حکومتی مداخلت کا اجتماعی طور پر مقابلہ کیا جا سکے۔
وال اسٹریٹ جرنل کی ایک رپورٹ کے مطابق، امریکہ کی کئی نمایاں جامعات کے رہنماؤں نے ٹرمپ انتظامیہ کی جانب سے تحقیقی فنڈنگ میں کٹوتیوں اور تعلیمی خودمختاری پر دباؤ کے خلاف مشترکہ لائحہ عمل اپنانے کے لیے ایک غیر رسمی گروپ تشکیل دیا ہے۔ اس اتحاد میں تقریباً دس سرکردہ تعلیمی ادارے شامل ہیں، جن میں زیادہ تر آئیوی لیگ اور دیگر بڑی تحقیقاتی جامعات شامل ہیں۔
اطلاعات کے مطابق، حالیہ دنوں میں ہارورڈ یونیورسٹی پر “ثقافتی تبدیلی” کے مطالبات کے بعد یہ کوششیں تیز ہو گئی ہیں۔ گروپ میں شریک یونیورسٹی صدور اور بورڈ آف ٹرسٹیز نے کچھ بنیادی اصولوں پر اتفاق کیا ہے، جیسے کہ تعلیمی آزادی، داخلے کے فیصلوں، ملازمتوں کی پالیسیوں اور نصاب کے معاملات پر کسی بھی قسم کی حکومتی مداخلت کو مسترد کرنا۔
ذرائع کا کہنا ہے کہ یہ ادارے اس بات کو یقینی بنانے کی کوشش کر رہے ہیں کہ کوئی بھی یونیورسٹی انتظامیہ کے دباؤ میں آ کر ایسا معاہدہ نہ کرے جو دیگر اداروں پر بھی اثر انداز ہو سکے۔ رپورٹ میں یہ بھی بتایا گیا کہ ٹرمپ انتظامیہ نے اشرافیہ کی جامعات پر دباؤ ڈالنے کے لیے وفاقی فنڈنگ روکنے، بین الاقوامی طلبہ کے ویزے منسوخ کرنے اور سیاسی ایجنڈے کے مطابق اصلاحات پر مجبور کرنے جیسے اقدامات کیے ہیں۔ ان کارروائیوں کا نشانہ بننے والوں میں کولمبیا یونیورسٹی اور ہارورڈ سمیت درجنوں اعلیٰ تعلیمی ادارے شامل ہیں۔
