چراغ پاسوان: مرکز چھوڑ کر بہار کی سیاست میں سرگرم ہوں گا

چراغ پاسوان نے بہار اسمبلی انتخابات لڑنے کا عندیہ دیا، شراب بندی قانون میں نرمی کی حمایت کی اور کہا کہ جلد مرکز کی سیاست چھوڑ کر بہار پر توجہ مرکوز کریں گے۔

بہار میں اسمبلی انتخابات قریب آتے ہی سیاسی سرگرمیاں تیز ہو گئی ہیں۔ لوک جن شکتی پارٹی (رام ولاس) کے صدر اور مرکزی وزیر چراغ پاسوان نے اعلان کیا ہے کہ اگر پارٹی چاہے تو وہ اسمبلی انتخابات لڑنے کے لیے تیار ہیں۔ انھوں نے کہا کہ وہ زیادہ دنوں تک مرکز کی سیاست میں نہیں رہیں گے اور بہار ہی ان کی سیاست کا مرکز ہوگا۔
چراغ پاسوان نے تیجسوی یادو کے اس مطالبے کی حمایت کی ہے کہ شراب بندی قانون سے ’تاری‘ کو ہٹایا جائے۔ ان کا کہنا تھا کہ یہ مطالبہ درست ہے اور ان کی پارٹی بھی پہلے سے اس کی حمایت کرتی رہی ہے، لیکن چوں کہ وہ حکومت میں شامل نہیں ہیں اس لیے کابینہ میں یہ مسئلہ نہیں اٹھا سکتے۔
کشمیر کے پہلگام میں دہشت گرد حملے پر چراغ پاسوان نے اپوزیشن کے بعض رہنماؤں کے بیانات کو افسوسناک قرار دیتے ہوئے کہا کہ ایسے موقع پر ملک کو متحد رہ کر دشمن کا مقابلہ کرنا چاہیے۔
این ڈی اے میں سیٹوں کی تقسیم پر چراغ پاسوان کا کہنا تھا کہ جیسے لوک سبھا انتخابات میں اتفاق رائے سے سیٹوں کا بٹوارہ ہوا تھا، ویسے ہی اسمبلی انتخابات کے لیے بھی سیٹوں کی تقسیم ہو جائے گی۔جتن رام مانجھی کی امیت شاہ سے ملاقات پر چراغ پاسوان نے کہا کہ اگر کوئی معاملہ تھا تو مانجھی جی نے ضرور اسے بی جے پی قیادت کے سامنے رکھا ہوگا اور انھیں تسلی بخش جواب ملا ہوگا۔