اسرائیل کا غزہ میں فوجی کارروائی بڑھانے کا اعلان

اسرائیل نے غزہ میں فوجی کارروائی میں توسیع کا اعلان کیا ہے، جس کے نتیجے میں شدید فضائی حملے جاری ہیں اور درجنوں فلسطینی جاں بحق ہو چکے ہیں۔

اسرائیلی وزیرِ دفاع، اسرائیل کاٹز نے اعلان کیا ہے کہ غزہ میں جاری فوجی آپریشن کو وسعت دی جا رہی ہے، جس کے تحت علاقے کے بڑے حصے کو اسرائیلی سکیورٹی زون میں شامل کرنے کی حکمتِ عملی اپنائی جا رہی ہے۔
بدھ کے روز جاری کیے گئے ایک بیان میں کاٹز نے کہا کہ لڑائی سے متاثرہ علاقوں میں فلسطینیوں کی بڑے پیمانے پر نقل مکانی متوقع ہے۔ ان کا کہنا تھا کہ غزہ کے عوام کو حماس کے خاتمے اور اسرائیلی یرغمالیوں کی واپسی کے لیے آواز بلند کرنی چاہیے، کیونکہ یہی اس جنگ کے خاتمے کا واحد حل ہے۔ تاہم، وزیرِ دفاع نے یہ واضح نہیں کیا کہ اسرائیل غزہ کے کتنے حصے پر قبضہ کرنا چاہتا ہے۔
یہ بیان ایسے وقت میں آیا ہے جب غزہ پر اسرائیلی حملوں میں تیزی دیکھی جا رہی ہے۔ مقامی ذرائع کے مطابق، گذشتہ رات جنوبی غزہ کے رفح علاقے میں اسرائیلی فضائی حملوں اور گولہ باری کے نتیجے میں کم از کم 20 فلسطینی جاں بحق ہوئے، جن میں ایک ہی خاندان کے 11 افراد بھی شامل ہیں۔
عینی شاہدین کا کہنا ہے کہ اسرائیلی جنگی طیارے اور ٹینک رفح اور خان یونس کے کئی علاقوں پر بمباری کر رہے ہیں، جب کہ توپ خانے کی گولہ باری بھی جاری ہے۔ ساتھ ہی، اسرائیلی فوجی گاڑیاں وسطی رفح کی جانب بڑھ رہی ہیں۔
فلسطینی مرکزِ اطلاعات کے مطابق، بدھ کی صبح اسرائیلی فوج کی کارروائیوں میں کم از کم 17 افراد جاں بحق ہو گئے۔ ذرائع کے مطابق، اسرائیلی فضائیہ نے جنوبی غزہ میں مسلسل حملے کیے، جبکہ خان یونس میں رفح گیراج کے قریب ایک مکان کو نشانہ بنایا گیا، جس کے نتیجے میں پانچ فلسطینی اپنی جان سے ہاتھ دھو بیٹھے۔
غزہ میں جاری اسرائیلی حملوں کے باعث ہلاکتوں کی تعداد میں مسلسل اضافہ ہو رہا ہے اور انسانی حقوق کی تنظیمیں اس صورتحال پر شدید تشویش کا اظہار کر رہی ہیں۔