بنگلہ دیش کا بھارت کو چیلنج: سمندر کا واحد گارڈین ہم ہیں

بنگلہ دیش کے چیف ایڈوائزر محمد یونس نے چین کے دورے پر بھارت کے شمال مشرقی ریاستوں کو “لینڈ لاکڈ” قرار دیتے ہوئے کہا کہ بنگلہ دیش اس خطے کا واحد سمندری محافظ ہے، اور چین کو سرمایہ کاری کی دعوت دی۔

چین کے دورے پر گئے بنگلہ دیش کے چیف ایڈوائزر محمد یونس کے حالیہ بیانات نے بھارت میں تشویش پیدا کر دی ہے۔ انہوں نے کہا کہ اس خطے میں سمندر کا واحد محافظ بنگلہ دیش ہے اور بھارت کے شمال مشرقی سات ریاستیں سمندر تک براہ راست رسائی نہیں رکھتیں، جس سے بنگلہ دیش ایک اہم تجارتی راستہ بن سکتا ہے۔ انہوں نے چین کو بنگلہ دیش میں سرمایہ کاری کی دعوت دی اور بھارت کی اقتصادی مجبوریوں کو نمایاں کیا۔
محمد یونس نے بیجنگ میں صدر شی جن پنگ سے ملاقات کے دوران نو معاہدے کیے اور چین کو “اچھا دوست” قرار دیا، جس سے دونوں ممالک کے تعلقات ایک نئے دور میں داخل ہو سکتے ہیں۔ اس دوران انہوں نے چین کو بنگلہ دیش کے آبی وسائل کے انتظام کا 50 سالہ معاہدہ دینے کا عندیہ بھی دیا۔
بھارت نے ابھی تک یونس کے ان بیانات پر باضابطہ ردعمل نہیں دیا، لیکن آسام کے وزیر اعلیٰ ہمنتا بسوا سرما نے ان کے بیان کو “اشتعال انگیز اور ناقابل قبول” قرار دیا۔ انہوں نے کہا کہ یہ بیانات بھارت کے حساس “چکن نیک” کوریڈور کی کمزوریوں کو اجاگر کرتے ہیں، جس کے ذریعے بھارت اپنی شمال مشرقی ریاستوں سے جڑا ہوا ہے۔
بھارتی ماہر اقتصادیات سنجیو سانیال نے بھی یونس کے بیانات پر سوال اٹھاتے ہوئے کہا کہ چین کو بنگلہ دیش میں سرمایہ کاری سے بھارت کے شمال مشرقی علاقوں کے زمینی راستوں کا کیا تعلق ہے؟
یونس کے اس مؤقف سے چین کے بڑھتے اثر و رسوخ اور بنگلہ دیش کی خارجہ پالیسی کے توازن پر بھی سوالات اٹھ رہے ہیں۔