حماس نے یرغمالیوں کی رہائی ملتوی کر دی

اسرائیل کی جانب سے غزہ جنگ بندی معاہدے کی خلاف ورزی پر حماس نے یرغمالیوں کی رہائی غیر معینہ مدرت تک روک دی۔

حماس کے مسلح ونگ، القسام بریگیڈز کے ترجمان ابو عبیدہ نے اعلان کیا ہے کہ ہفتے کے روز رہائی کے منتظر یرغمالیوں کی رہائی کو معطل کر دیا گیا ہے، اور یہ عمل اس وقت تک جاری نہیں ہوگا جب تک کہ اسرائیل ماضی کے معاہدے کی شرائط پر عمل نہیں کرتا۔ انہوں نے کہا کہ حماس معاہدے کی شرائط پر عمل کرنے کے لیے تیار ہے بشرطیکہ اسرائیل بھی اپنی ذمہ داریوں کو پورا کرے۔

اسرائیلی وزیر دفاع اسرائیل کاٹز نے اس اعلان کے ردعمل میں فوج کو غزہ میں کسی بھی ممکنہ صورتحال سے نمٹنے کے لیے تیار رہنے کی ہدایت دی ہے۔ ان کا کہنا تھا کہ حماس کا یہ اقدام جنگ بندی معاہدے کی مکمل خلاف ورزی ہے۔

حماس کے اعلان کے بعد غزہ میں صورتحال مزید کشیدہ ہو گئی ہے، اور دونوں اطراف میں تصادم کے خطرات بڑھ گئے ہیں۔ 7 اکتوبر 2023 کو اغوا کیے گئے 79 افراد میں سے اب تک صرف 20 افراد کو جنگ بندی کے دوران رہا کیا جانا تھا، جن میں سے 8 افراد کی ہلاکت کی اطلاعات ہیں۔ اس کے بدلے اسرائیل نے 183 فلسطینی قیدیوں کو رہا کیا ہے۔

دوسری جانب، قطر میں ہونے والے معاہدے کے تحت جنگ بندی کے دوسرے مرحلے کی بات چیت پیر کو شروع ہونے والی تھی، تاہم حماس نے الزام عائد کیا کہ اسرائیل نے معاہدے کے مطابق پناہ گاہوں کی فراہمی کی اجازت دینے سے انکار کر دیا ہے، جس سے خطے میں مزید کشیدگی بڑھ گئی ہے۔