احسان قاسمی کو پروفیسر احمد حسن دانش ایوارڈ سے نوازا گیا
ڈاکٹر قسیم اختر نے اعلان کیا کہ مجلسِ شعر و ادب کشن گنج کی جانب سے یہ سلسلہ ان شاء اللہ جاری رہے گا
(کشن گنج) مجلسِ شعر و ادب کشن گنج نے اپنے اولین “پروفیسر احمد حسن دانش ایوارڈ برائے تحقیق و تنقید 2025” سے معروف افسانہ نگار، شاعر اور محقق احسان قاسمی (پورنیہ) کو سرفراز کیا۔ یہ تقریب اوریکل انٹرنیشنل اسکول، چکلہ، کشن گنج کے اشتراک سے اسکول کے میٹنگ ہال میں بتاریخ 9 فروری، 2025، بروز اتوار منعقد ہوئی۔
تقریب کے موقع پر قاضی رضوان ندوی کی تصنیف “دیوانِ غالب کا عروضی مطالعہ” کی رسمِ اجرا عمل میں آئی، جبکہ احسان قاسمی کی جلد شائع ہونے والی کتاب “قلم دھنک رنگ” کے سرورق کی بھی باقاعدہ رونمائی کی گئی۔
اس تقریب کی خاص بات یہ تھی کہ پروفیسر احمد حسن دانش مرحوم کے صاحبزادگان بہزاد دانش، شہزاد دانش، شاداں دانش، صاحبزادی فروزاں دانش اور داماد شایان امین خصوصی طور پر پورنیہ سے تشریف لائے اور تقریب کو رونق بخشی۔
تقریب کی صدارت جناب سفیر الدین راہی (ڈائریکٹر، اوریکل انٹرنیشنل اسکول) نے فرمائی، جبکہ نظامت کے فرائض جہانگیر نایاب نے انجام دیے۔ بزرگ شعراء حازم حسان اور ممتاز نیر، سینئر صحافی نعیم الدین قاسمی، شاہنواز بابل، اردو ادب کے ممتاز اساتذہ ڈاکٹر قسیم اختر (صدر، شعبہ اردو، مارواڑی کالج، کشن گنج)، ڈاکٹر مجاہد حسین (صدر، شعبہ اردو، پورنیہ کالج، پورنیہ)، طیب فرقانی (چیف ایڈمن، اشتراک ڈاٹ کام، مغربی بنگال)، اور رضوان ندوی سمیت دیگر علمی و ادبی شخصیات نے پروفیسر احمد حسن دانش مرحوم کی علمی و تحقیقی خدمات پر روشنی ڈالی اور احسان قاسمی کو مبارکباد پیش کی۔
شعری نشست:
تقریب کے دوسرے حصے میں ایک شعری نشست کا اہتمام کیا گیا، جس کی صدارت حازم حسان نے کی۔ اس موقع پر ڈاکٹر قسیم اختر نے ایک تہنیتی نظم پیش کی اور اسے فریم کروا کر احسان قاسمی کو پیش کیا۔ شعری نشست میں درج ذیل شعراء نے کلام سنایا:
- ممتاز نیر (ٹھاکر گنج)
- نثار دیناج پوری (مغربی بنگال)
- مبارک علمی (مغربی بنگال)
- رضوان ندوی (تیلتا، کٹیہار)
- عنایت وصی (ارریہ)
- شمشاد ضیاء (صالح پور، کٹیہار)
- حسان احسن (ٹھاکر گنج)
- کمیل بلیاوی
- ڈاکٹر مجاہد حسین (پورنیہ)
- آرزو صابر (کشن گنج)
- نجم السحر ثاقب (کوچا دھامن)
- ابو المفکر پیکر (بیگنا، ٹیڑھا گاچھ)
- عمران علیمی شاہد
- آفتاب اظہر صدیقی (پوٹھیا)
- احسان قاسمی
- حازم حسان (پلاسمنی)
سامعین میں مولانا شمیم ریاض ندوی، عارفین نور (ماہرِ تعلیم)، قیصر عالم سمیت کئی علمی و ادبی شخصیات شامل تھیں۔
احسان قاسمی کا اظہارِ خیال:
احسان قاسمی نے مجلسِ شعر و ادب کشن گنج کے منتظمین اور اراکین کا شکریہ ادا کرتے ہوئے کہا:
“پروفیسر احمد حسن دانش میرے استاد تھے، جنہوں نے تحقیق کے میدان میں مجھے حوصلہ بخشا۔ ان کے نام سے جاری ہونے والے اس ایوارڈ کا ملنا میرے لیے کسی بیش قیمت اعزاز سے کم نہیں۔”
آئندہ ایوارڈز کا اعلان:
ڈاکٹر قسیم اختر نے اعلان کیا کہ مجلسِ شعر و ادب کشن گنج کی جانب سے یہ سلسلہ ان شاء اللہ جاری رہے گا اور مئی و اکتوبر 2025 میں درج ذیل ایوارڈز دیے جائیں گے:
- مولوی محمد سلیمان سلیماں لائف ٹائم اچیومنٹ ایوارڈ – حازم حسان (پلاسمنی)
- مولانا عیسیٰ فرتاب ایوارڈ برائے شاعری – مستحسن عزم (گاچھ پاڑا/ممبئی)
- پروفیسر طارق جمیلی ایوارڈ برائے تخلیقی ادب – رفیع حیدر انجم (ارریہ)
- اکمل یزدانی جامعی ایوارڈ برائے صحافت – مولانا نعیم الدین قاسمی (بانی و مدیر، ضمانتِ حق، کشن گنج)
یہ تقریب علمی، تحقیقی اور ادبی اعتبار سے ایک اہم سنگِ میل ثابت ہوئی، جس میں شرکت کرنے والے تمام معززین نے مجلسِ شعر و ادب کشن گنج کی کوششوں کو سراہا۔
