ٹرمپ کا دعویٰ یوکرین جنگ کا خاتمہ چاہتے ہیں پوتن

ٹرمپ کا روسی صدر پوتن کو فون، روس نے یوکرین جنگ کے خاتمے پر آمادگی ظاہر کردی ہے

نیو یارک پوسٹ کے مطابق، سابق امریکی صدر ڈونلڈ ٹرمپ نے کہا ہے کہ روسی صدر ولادیمیر پوتن یوکرین جنگ کا خاتمہ چاہتے ہیں تاکہ مزید اموات کو روکا جا سکے۔ ٹرمپ نے کہا کہ “اگر میں صدر ہوتا تو روس اور یوکرین کی جنگ کبھی شروع نہ ہوتی” اور یہ کہ جوبائیڈن امریکی قوم کے لیے شرمندگی کا باعث بنے ہیں۔

ٹرمپ نے مزید کہا کہ وہ یوکرین کے بے گناہ افراد کو یاد کرتے ہیں جو بے وجہ مارے گئے اور پوتن کو بھی ان کی حالت کا احساس ہے۔ انہوں نے اس جنگ کے جلد خاتمے کی اہمیت پر زور دیتے ہوئے کہا کہ ان کے پاس اس کے خاتمے کے لیے ایک ٹھوس منصوبہ موجود ہے۔

انہوں نے جنگ کے خاتمے کی امید ظاہر کرتے ہوئے کہا کہ “ہر دن لوگ مر رہے ہیں اور یہ جنگ بد سے بدترین ہوتی جا رہی ہے،” اور یہ کہ جنگ کا جلد خاتمہ ضروری ہے۔

تاہم، روسی حکومت کے ترجمان دمتری پسکوف نے اس رپورٹ کی تصدیق یا تردید کرنے سے انکار کر دیا، اور کہا کہ روس اور امریکا کے درمیان رابطے مختلف چینلز کے ذریعے ہوتے ہیں۔

امریکی نائب صدر جے ڈی وینس اگلے ہفتے میونخ سیکیورٹی کانفرنس میں یوکرینی صدرزیلنسکی سے ملاقات کریں گے، جب کہ امریکی صدر ٹرمپ نے یوکرین کے ساتھ ایک 500 ملین ڈالر کے معاہدے کی تجویز دی ہے، جس کے تحت یوکرین کو نایاب معدنیات اور گیس تک رسائی ملے گی اور بدلے میں سیکیورٹی کی ضمانتیں فراہم کی جائیں گی۔