چھتیس گڑھ میں 50 نکسلیوں نے ہتھیار ڈالے، امت شاہ کا بڑا دعویٰ

چھتیس گڑھ کے بیجاپور میں 50 نکسلیوں نے ہتھیار ڈال کر خودسپردگی اختیار کر لی، جس پر وزیر داخلہ امت شاہ نے انہیں قومی دھارے میں شامل ہونے کا خیرمقدم کیا۔

بھارت کے مرکزی وزیر داخلہ امت شاہ نے کہا ہے کہ چھتیس گڑھ کے بیجاپور میں 50 نکسلیوں نے ہتھیار ڈال کر خودسپردگی اختیار کر لی ہے۔ یہ پیش رفت حکومت کی اس پالیسی کے تحت سامنے آئی ہے، جس کا مقصد نکسلیوں کو تشدد کا راستہ چھوڑ کر قومی دھارے میں شامل کرنا ہے۔
امت شاہ نے اتوار کے روز سوشل میڈیا پلیٹ فارم “ایکس” پر اس بارے میں اطلاع دیتے ہوئے کہا، “یہ نہایت خوشی کی بات ہے کہ بیجاپور میں 50 نکسلیوں نے تشدد کو ترک کر کے خودسپردگی اختیار کی۔ میں ان تمام افراد کا خیرمقدم کرتا ہوں جو ہتھیار چھوڑ کر ترقی کی راہ میں شامل ہو رہے ہیں۔” انھوں نے مزید کہا کہ وزیر اعظم نریندر مودی کی پالیسی واضح ہے کہ جو بھی نکسلی ہتھیار ڈال کر ترقی کے راستے کو اپنائے گا، اس کی بحالی میں حکومت مکمل تعاون فراہم کرے گی۔
امت شاہ نے دیگر نکسلیوں سے بھی اپیل کی کہ وہ ہتھیار چھوڑ کر قومی دھارے میں شامل ہو جائیں اور ترقی و خوش حالی کی راہ اپنائیں۔ انھوں نے اس موقع پر ایک بڑا دعویٰ کرتے ہوئے کہا کہ 31 مارچ 2026 کے بعد نکسلواد صرف تاریخ کا حصہ بن کر رہ جائے گا۔ ان کے مطابق، حکومت کی مسلسل کوششوں اور ترقیاتی پالیسیوں کی بدولت ملک میں نکسلی سرگرمیاں تیزی سے کم ہو رہی ہیں، اور آنے والے وقت میں یہ مسئلہ مکمل طور پر ختم ہو جائے گا۔