ایران کا سخت ردعمل، اسرائیلی حملے،خطے میں جنگ کا خطرہ بڑھ گیا
مسعود پیزشکیان نے حملے کی مذمت کی، ایران نے جواب کی دھمکی دی، لبنان میں اسرائیل کے حملے جاری ہیں۔
مسعود پیزشکیان نے جنوبی ایران میں واقع لاوان آئل ریفائنری پر ہونے والے حملے کی شدید مذمت کرتے ہوئے اسے اشتعال انگیزی قرار دیا ہے۔ سرکاری خبر رساں ادارے اسلامک ریپبلک نیوز ایجنسی کے مطابق ایرانی قیادت نے اس واقعے کو حالیہ جنگ بندی کی متعدد خلاف ورزیوں میں سے ایک قرار دیا ہے۔رپورٹس کے مطابق ایرانی حکام کا کہنا ہے کہ ملک کی تنصیبات کو نشانہ بنانے کا ہر اقدام ناقابل قبول ہے اور اس کا بھرپور جواب دیا جائے گا۔ سرکاری ذرائع نے واضح کیا کہ ایران اپنی خودمختاری اور قومی سلامتی پر کسی قسم کا سمجھوتہ نہیں کرے گا، اور اگر حملوں کا سلسلہ جاری رہا تو اس کے نتائج سنگین ہو سکتے ہیں۔
دوسری جانب لبنان کی صورت حال بھی بدستور کشیدہ ہے، جہاں اسرائیل کی جانب سے فضائی کارروائیاں جاری ہیں۔ اسرائیلی حکام نے دعویٰ کیا ہے کہ انہوں نے ایک ہی وقت میں کئی اہداف کو نشانہ بنایا، جن میں مختصر دورانیے میں درجنوں مقامات شامل تھے۔ ان حملوں کے باعث خطے میں خوف و ہراس کی فضا مزید گہری ہو گئی ہے اور شہری آبادی شدید متاثر ہو رہی ہے۔ایران نے ایک بار پھر خبردار کیا ہے کہ اگر اس کے اتحادیوں یا مفادات پر حملے بند نہ کیے گئے تو وہ جوابی اقدامات کرنے پر مجبور ہوگا۔ مبصرین کے مطابق یہ بیانات خطے میں بڑھتی ہوئی کشیدگی کی عکاسی کرتے ہیں، جو کسی بڑے تصادم کا پیش خیمہ بھی بن سکتے ہیں۔
ادھر ڈونلڈ ٹرمپ نے اپنے بیان میں کہا ہے کہ اسرائیل، ایران کے ساتھ طے پانے والے معاہدے کی خلاف ورزی نہیں کر رہا۔ انہوں نے لبنان میں جاری جھڑپوں کو ایک علیحدہ معاملہ قرار دیا، جس کا براہ راست تعلق اس معاہدے سے نہیں ہے۔ ان کے اس مؤقف کو بعض حلقوں کی جانب سے تنقید کا سامنا بھی ہے، جو اسے زمینی حقائق سے متصادم قرار دیتے ہیں۔یاد رہے کہ گزشتہ چند ہفتوں کے دوران لبنان میں ہلاکتوں کی تعداد میں خطرناک حد تک اضافہ ہوا ہے۔ اطلاعات کے مطابق ہزاروں افراد اپنی جانوں سے ہاتھ دھو بیٹھے ہیں، جن میں بڑی تعداد بچوں کی بھی شامل ہے، جبکہ لاکھوں لوگ بے گھر ہو چکے ہیں۔ انسانی بحران شدت اختیار کرتا جا رہا ہے اور عالمی برادری پر دباؤ بڑھ رہا ہے کہ وہ فوری مداخلت کرے تاکہ حالات کو مزید بگڑنے سے روکا جا سکے۔
